Dagur 15

Þá er ég vöknuð, klukkan er 08:31 og ég er búin að undirbúa morgunmatinn: Hafragrautur með Chia fræjum og banana, grænt te og ekki má gleyma 0,5 lítra vatnsflöskunni minni :) Þetta kemur mér sko ágætlega inn í daginn

Mikið sem mér finnst gaman að fara á æfingu núna. Þegar maður er kominn yfir einhvern ákveðinn múr þá getur maður bara ekki hætt! Ég tók til dæmis hvíldardag á sunnudaginn, en maður verður víst stundum að gera það, og mér bara fannst eins og það vantaði eitthvað inn í daginn eins undarlegt og það hljómar. Það er ekki eins og ég sé einhver afreksíþróttamaður en þetta er bara svo gott fyrir líkamann og ekki síst sálina en þrátt fyrir sára vöðva eða brunnin lungu þá kemur maður endurnærður út eftir hverja æfingu :) Þá er ég oftast eitthvað að sprikla sjálf í salnum á hlaupabrettinu og stigvélinni og geri svo æfingar á dýnu, s.s. hnébeygjur, magaæfingar, armbeygjur og fleira, en svo finnst mér líka gaman að fara með vinkonunum í Body pump!

Ég reyni alltaf að borða á 2-3 klst. fresti. Lykillinn að því er að vera undirbúinn og hafa alltaf klárt einhvers konar millimál sem er gott að grípa í ef maður hefur lítinn tíma. Hér eru dæmi um þau millimál sem ég fæ mér oftast:

•      Epli með hnetusmjöri frá Himneskri hollustu
•      Gulrætur
•      Hrökkkexið mitt góða
•      Hámark próteindrykkur
•      Hleðsla próteindrykkur
•      Smoothie úr frosnum ávöxtum
•      Allir ávextir

Ég hef líka komist að því að ef maður á ávexti, ég á oftast bara epli, appelsínur og banana, þá er maður í góðum málum. Ótrúlegt hvað niðurskorin appelsína sem er búin að fá að kólna inni í ísskáp er góð!

Hvað varðar húsbandið mitt hann Alexander, hið mikla meistaraefni, þá gafst hann upp á degi tvö. Hann á bara of erfitt með að sleppa kókinu þessi elska <3 Hann er þó duglegur að hvetja mig áfram og segja mér hvað ég er dugleg, svo hann er bara meistari í því í staðinn!

Ég verð nú að minnast á það að hún Ragnheiður Hekla litla frænka kom norður á Akureyri til okkar um helgina og eyddi tíma með okkur. Við fórum í sund á Þelamörk, út að borða, versla í bænum og í Jólahúsið auk þess sem að hún fékk að hjálpa mér við að elda uppáhalds réttinn sinn, Pestókjúkling með pasta. Svo komum við henni aðeins á óvart með snemmbúna afmælistertu og smá gjafir, en hún á afmæli þann nítjánda og ekki komumst við suður til að vera með henni þá. Hún var svo hissa og það var svo gaman! Takk fyrir samveruna Ragnheiður Hekla :)

Hér er slóðin á þennan dýrindis Pestókjúkling hennar Evu Laufeyjar sem gæti ekki verið auðveldara að matreiða. Ég hef þó yfirleitt bara soðið Tagliatelle pasta með og salat og hvítlauksbrauð. Nammigottímalla! - http://www.evalaufeykjaran.com/2011/11/kjuklingur-i-flyti.html - 

Þar til næst :)

Hólmfríður MEISTARI

Dagur 10

Ég ætlaði að vera löngu búin að setja inn aðra færslu hér en það er bara búið að vera nett brjálað að gera, undirbúningur fyrir nafnaveislu elsku Andreu Óskar sem fékk nafnið sitt síðasta laugardag, og svo hefur þessi vika farið í vinnu, æfingar og lærdóm. Annars lofa ég að vera duglegri að skrifa hingað inn það sem eftir er mánaðar.

Jæja ég hef lifað af 10 daga sem meistari lífs míns! Mikið er það ánægjulegt :)

Ég hef náð að standa við öll mín markmið, NEMA ég hef ekki getað krossað samviskusamlega í reitina hjá ,,Útivera 1 klst. á dag’’ í Excel-skjalinu mínu þar sem að ég hef ekki alltaf náð klukkutíma á dag, EN þó alltaf eitthvað enda dregur Nói mig út.

Hvað varðar sykurinn þá hélt ég að það yrði mikið erfiðara, en ég hef óafvitandi bara ekki verið að borða mjög mikinn sykur í mínu daglega matarræði. Það eru þá bara kökurnar, nammið, gosdrykkirnir og það sem ég hef þurft að forðast og það er nú ekki svo mikið mál :) ,,No problem for John Boblem’’ eins og maðurinn sagði

Þar sem margir elskuðu uppskriftina af hrökkbrauðinu sem ég setti inn síðast, sem er þó alls engin uppskrift eftir mig sjálfa, langar mig að deila með ykkur uppskrift sem ég fékk hjá Jófríði vinkonu minni af dýrindis möndlukökum.

Möndlukökur

250g möndlumjöl, 

2egg (3 ef þau eru lítil) 

2-3 msk smjör, 

2tsk vínsteinslyftid. 

1/2-1 dl kókospálmasykur,

lúka af rúsínum eða dökku súkkulaði.

Þetta blandast allt saman og verður svolítið klístrað. Mótið fremur litlar kúlur með skeið og setjið á bökunarplötu. Bakist á 180° í 15-20 mínútur.

En jæja þá ætla ég að fara að drífa mig á kvöldæfingu. Það er eitthvað svo gott að vera í hálftómum líkamsræktarsal og horfa á myrkrið úti þá dettur maður alveg í annan heim. Hér er lag sem kemur mér í gírinn þessa dagana en góð pepp-lög eru nauðsynleg til þess að koma manni af stað!

Dagur eitt

Undirbúningur fyrir daginn

Þá er Meistaramánuður hafinn af alvöru. Ég vaknaði klukkan 7 í morgun, henti öllum karamellubréfunum af eldhúsborðinu síðan í gærkvöldi og fór í að gera hafragrautinn góða.
Ég hef mjög góða tilfinningu fyrir þessum mánuði, þó að hann verði kannski ekki sá auðveldasti. Enda gat ég ekki sofnað í gærkvöldi og  held ég að það hafi frekar verið af tilhlökkun en stressi :)

Ég skellti í gómsætt hrökkbrauð í morgun sem er gott millimál hvar og hvenær sem er. Ég set oft á það tómata, smurost, papriku, kotasælu eða hvað sem er. Svo er það líka mjög gott bara eintómt! Hér er uppskriftin:

1 dl haframjöl
1 dl hörfræ
1 dl sesamfræ
1 dl graskerjafræ
1 dl sólblómafræ
1 1/2 dl fínmalað spelt
2 dl grófmalað spelt
1 tsk vínsteinslyftiduft
2 tsk salt
2 dl vatn
1 dl olía

Þurrefnunum er blandað saman í skál með sleif og svo olíu og vatni. Skiptið deiginu í 2 hluta sem eru flattir út með höndunum á milli tveggja bökunarpappíra á plötu. Gott er að skera með hníf í deigið þegar búið er að fletja það út og skipta því þannig niður í hæfilega stóra bita áður en það fer í ofninn. Þá er auðvelt að brjóta brauðið niður þegar það kólnar. Bakið svo báðar plöturnar í einu á blæstri og 170° í 15-20 mín.

Í gær prófaði ég að gera Sorbet úr frosnu mangó og berjum. Ég skellti bara mangó, jarðarberjum og smá hindberjum í blandarann ásamt vatni og setti á fullt þar til það var orðið mjúkt og gott. Ég setti svo aðeins af Agave sýrópi út í, og aðeins meira af því fyrir Alexander en honum fannst þetta svolítið súrt. Þetta mun klárlega vera eitt af því sem ég mun grípa í þennan mánuðinn þegar sykurþörfin er að gera út af við mig. Mega gott!

Ég náði að plata Alexander til að taka þátt í meistaramánuði með mér og setti hann sér markmið. Hann ætlar þó ekki að taka þetta af alveg eins mikilli alvöru og ég, en allt er betra en ekkert! Ég er búin að setja öll markmiðin okkar upp í Excel og á kvöldin skoðum við hvernig okkur gekk hvern dag fyrir sig. Það verður gott að hafa smá stuðning í þessu öllu saman.

Næst á dagskrá er það langur göngutúr með Nóa mínum og svo beint upp í Ásveg að standsetja heimilið fyrir nafnaveisluna sem verður þar um næstu helgi :)

-Þar til næst

Meistaramánuður

Í ár hef ég ákveðið að taka þátt í hinum margumtalaða Meistaramánuði. Fyrir þá sem ekki vita eru markmiðin með Meistaramánuði sem hér segir:

,,Meistaramánuður felst í því að þátttakendur vakni fyrr, neyti ekki áfengis og hreyfi sig vel ásamt því að borða og njóta lífsins betur en aðra daga. Meistaramánuðurinn er mánuður þar sem við setjum okkur markmið og búum til góðar venjur fyrir alla hina mánuðina. Markmiðin geta verið stór sem smá og geta verið allt frá því að taka sér tak í ræktinni eða bara að kíkja oftar í heimsókn á ömmu og afa.

Eina þátttökuskilyrðið er að fólk sé tilbúið að skora sjálft sig á hólm og leitist við að sigrast á raunum mánaðarins. Meistaramánuður stendur yfir í 30 daga og mun ögra þátttakendum líkamlega og andlega í átt að því að verða meistarar eigin lífs.’’

Mig langar til þess að nota þessa síðu til að deila markmiðum mínum með vinum og vandamönnum og segja ykkur frá því sem ég geri til að færast skrefi nær heilbrigðara líferni en fyrst og fremst til þess að hvetja sjálfa mig áfram :)

Hér koma markmiðin mín fyrir meistaramánuð 2013:

Ekkert áfengi

Enginn hvítur sykur

Alltaf ná 8 klst. svefni, og ekki mínútu lengur

Æfing 6 sinnum í viku

Ein klst. útivera á dag

Klára að lesa bók sem ég byrjaði á í fyrra

Hafa jákvæðnina og hrós til annarra í hámarki

Ævintýrið byrjar semsagt þann fyrsta október. Ekki væri verra ef þið væruð dugleg að kommenta og segja mér hvað ég sé æðisleg og dugleg :) þá held ég áfram að verða betri manneskja og ekki getið þið, kæru lesendur, tapað á því!

ÁFRAM ÉG

Newsflash

Jæja ætli maður skelli ekki inn einni færslu hérna svona upp á gamanið :)

Ég byrjaði í vettvangsnámi í morgun í Álfhólsskóla. Það var mjög spennandi og margt að sjá, enda fjölmennasti skóli landsins. Þarna er mikið lagt upp úr listum og verklegum greinum og var nóg að gera, lentum meira að segja inni á sýningu þar sem 5. bekkur var búinn að semja leikrit sem var samsett úr Strumpunum, Harry Potter og Lord of the rings, og til að toppa þetta allt saman þá sungu þau "La dolce vita" í lokin :) Þetta var mikil upplifun. Ég mæti þarna í fyrramálið líka en svo á mið. og fim. fer ég í Réttarholtsskóla. Ég fann strax þegar ég kom þarna inn að ég væri komin á rétta hillu og ég hlakka svo mikið til að vinna við þetta í framtíðinni. Ég varð líka spenntari fyrir því að kenna miðstigi eða 5-7 bekk heldur en ég var áður en ég hafði hugsað mér að sérhæfa mig bara í yngstu bekkjunum. Þetta kemur allt í ljós.

Við Silfá fórum í bíó í gærkvöldi á "Drive" í Egilshöll. Þetta er svaðalegt bíó, alger paradís fyrir bíónörd eins og mig! Mikið svakalega kom þessi mynd á óvart. Við Silfá héldum að við værum að fara á frekar auðvelda spennumynd um mann sem keyrir bíl, eitthvað svipað og "Fast and the furious", en nei.. þetta var eitthvað allt annað! Mjög góð mynd samt sem áður :)

Faðir vor kom í bæinn í dag í eina af hans vinnuferðum. Einhvern vegin finnst mér eins og þessum vinnuferðum hans í borgina hafi fjölgað eftir að ég flutti suður...merkilegt! En ekki kvarta ég, gamli kaupir klósettpappír og passar mig ef einhver skyldi brjótast inn :)

Svo er ferðinni heitið norður á Akureyri á föstudaginn og ég get hreinlega ekki beðið! Ég hef ekki komið heim í einn og hálfann mánuð svo það er kominn tími til. Það verður gott að koma í herbergið sitt, hitta yndislegu fjölskylduna, borða mömmumat, göngutúr í Kjarna og ef til vill tjútt með stelpunum mínum!

En þá er best að fara að halla sér. Langt ferðalag í fyrramálið, en Álfholtsskóli er s.s. í Kópavogi og eru það 3 strætóar fyrir kl 08:00.. stundum væri alveg ómetanlegt að eiga bíl!

Yours truly,

Hólmfríður Þorgeirsdóttir.

New beginnings

Það hlaut að koma að því að mainstream gellan ég tæki upp á því að opna svona blogg, því það er víst rosalega “IN” í dag!

Aðalástæðan (eða afsökunin) fyrir því að ég er að hefja þetta ævintýri er sú að ég þarf, svo ég geri mig ekki að fífli í mínu háskólanámi, að æfa mig að skrifa og hvar er betra að gera það en fyrir framan alþjóð.
Hér ætla ég að setja inn hugleiðingar um daginn og veginn,  hluti sem vekja áhuga minn og svo auðvitað fréttir af mínu daglega lífi for all my fans!

Auðvitað ætlast ég til að þið commentið á þetta allt saman og segið hvað þið elskið mig mikið og getið ekki hætt að skoða :)

Þangað til næst

- Hófý